مدينة جنجو - كوريا الجنوبية / Jinju - South Korea

الناهردة هاكلمكم عن مدينة في كوريا الجنوبية: جنجو / Jinju

Taken by Steve Robinson under agreement from him -                             Jinju


جنجو هي مدينة موجودة في جنوب كوريا الجنوبية في محافظة اسمها Gyeongsang 

والتفاصيل الجغرافية عنها وتعداد سكانها ممكن تعرفوها من الويكيبيديا http://en.wikipedia.org/wiki/Jinju

لاني هاكلمكم عنها بطريق مختلفة هاكلمكم عنها من الداخل

مدينة جنجو مدينة ساحرة بمعني الكلمة، المدينة بالجبال اخضراء اللي محاوطاها و شوارعها المليانة بالاشجار ، ويمكن اغلب الناس اللي بيروحوا كوريا الجنوبية بيروحوا سول او بوسان انما مايعرفوش جنجو
أنا قررت أكتب عن جنجو لتكون مرجع للمصريين والعرب اللي يحبوا يروحوا كوريا الجنوبية سياحة علشان يعرفوا ايه هي جنجو وكمان لو فيه حد جات له فرصة انه يقعد في جنجو مايتعبش زي ما انا تعبت اول ما رحت.

من هنا هتعرف معلومات عن الطقس والمولات والسوبرماركت واماكن الزيارة والسينمات واماكن شراء اي منتجات والمطاعم والكافيهات
واي حد عنده استفسار يقدر يسأل واكيد هأرد عليه.

نبدأ ونتكلم عن:
 

 جو جنجو:   

كوريا الجنوبية بصفة عامة تتمتع بوجود الاربع فصول منفصلين : الصيف بحرارته المعقولة والمطر اللي بيرطب شوية من الجو، الخريف ببداية البرودة والجو المنعش وتغيير ألوان ورق الشجر، والشتاء ببرودته واحيانا نزول الثلج خاصة في اخر ديسمبر ويناير، اللي يروح سول العاصمة Seoul هيلاقيها في الشتا برد شديد ونزول التلج بيغلب طبع الشتاء هناك – طبعا بالنسبة لنا احنا في الشرق الاوسط التلج ده حاجة جميلة ونفسنا نشوفه - وهو فعلا رائع - بس الخروج فيه بيبقي صعب اوي وتقريبا بتبقي حبسة، هتستمتعوا بيه اول اسبوعين تلاتة بس مش اكتر انما في جنجو التلج بس في اواخر ديسمبر واوائل يناير.واخيرا الربيع وجوه الرائع والأشجار المورقة في كل مكان.

طبيعة الناس:

 الناس في جنجو طيبين جدا ومختلفين عن باقي المدن الكورية ، الكوريين بصفة عامة مؤدبين ومش هتلاقي حد بيعلي صوته وكلهم بيحترموا بعض – انما الناس في جنجو مؤدبين اكتر وطبعا منظمين كالعادة بس مش واخدين علي الاجانب (رغم ان فيها اجانب ) بس غالبا الاجانب اللي هناك مش بيخرجوا غير في اماكن محددة وغالبا بيتجمعوا فيها وبالتالي باقي جنجو مابيتعاملوش معاهم – وعلشان كده تلاقي قليل جدا لما حد يفهمك – بمعني- لو رحت كافيه مثلا اول حاجة هيعملوها انهم هيضحكوا – هم طبعا مش بسخروا منك – زي ما قلنا هم مؤدبين جدا – انما لانهم مش واخدين ان فيه اجانب ييتعاملوا معاهم بالذات الكافيهات المحلية انما الكافيهات المشهور زي ستاربكس ممكن تلاقي اللي فيها بيتكلم انجليزي.

طرق المواصلات إلي جنجو
 
اولا: فيه اتوبيس من مطار انشون بيصل مباشرة لجنجو وبيقوم من جنجو 3.30 الفجر وممكن تسأل عنه في المطار
KTX  ثانيا: قطار 
وهو قطار بتوصل من محطة سول الرئيسية لجنجو في 3.30 ساعة وده احسن وسيلة مواصلات واسرعها بس غالي
ثالثا: الأتوبيس، وممكن تأخده من محطة جانجنام في سول - ده شكل المحطة في جنجو

GPS   رابعا: ممكن تأجر عربية من المطار ويكون فيها جهاز
يوصللك علي العنوان اللي عايزه بس غالبا اسعار تأجير العربيات في المطار اغلي من خارجه

المهرجانات في جنجو

Jinju Namgang Yudeung festival
من اشهر مهرجانات كوريا الجنوبية وبيجيله الناس من كل انحاء كوريا  وميعاده من 1 - 10 أكتوبر وأفضل ان لو حد رايح سياحة كوريا يروح في التوقيت ده ويعمل حسابه انه يقضي يومين في جنجو لحضور المهرجان لانه فعلا بيكون رائع خاصة في اخر يوم لانهم بيعملوا فاير ووركس بتكون ممتعه جدا ودي صورة منه
بيقيموا المهرجان علي طول النهر من أول قلعة دندو حتي اشهر اوتيل " دونج بانج" -وبيفتتحه المحافظ وبعد حفلة بيقيمها اشهر فرق الغناء والرقص في جنجو ومايفوتكش ابدا حفلة الافتتاح لانهم بيبدأوا من القلعة و بيلفوا في منطقة الداون تاون
  

 

"نتكلم بقي علي المولات والسوبرماركت"

لازم تعرف ان السوبر ماركتات كلها بتقفل اول وتالت احد من الشهر علشان يسيبوا فرصة للبقالات الصغيرة انها تكسب في اليوم ده

1- Shinsage شينساجي: 

ده اشهر مول موجود في جنجو و موجود في اخر الشارع الرئيسي في جنجو اللي قدام الكوبري اللي جنب قلعة جنجو – وده باسميه مول الفرجة – لان غالبا كل مرة هتدخله مش هتشتري حاجة لان كل حاجة هناك براند مشهور بس غالي اغلي بكتير من مصر زي Levi's - Nike - Le coq sportif      وغيرهم ، بس ممكن في وقت التخفيضات تلاقي الملابس الرياضية عليها تخفيض معقول وممكن تشتريه

وكعادة المولات في كوريا الجنوبية فيه سوبرماركت في الدور الارضي وفيه منتجات مستوردة وبرضه غالي بس ممكن تلاقي منتجات بناكلها – فأحسن من انك تجوع هتصرف شوية بس تاكل . زي بعض انواع الجبن.

طبعا في جراج بس بفلوس وهم جراجين واحد منفصل عن المول والتاني في المول

والمول ده مشهور بالذات للسيدات .

2- Emart ايمارت:

 موجود قدام بوابة قلعة جنجو وده عنوانه:   3 Insa-dong, Jinju-si, Gyeongsangnam-do

  واسعاره معقولة ( رغم انها برضه اغلي من اللي نعرفه) وهتلاقي فيه دورخاص بالاجهزة المنزلية والكهربائية وده مش لازم يفوت حد لانك هتقدر تتعرف علي الجديد والفروقات بينهم ( وطبعا استحالة شراء اي جهاز من كوريا الجنوبية بسبب الاسعار الغالية بالنسبة لنا)- بس بالنسبة للفرجة رااائع – ومع ذلك ممكن تشتري حاجات خفيفة زي خلاط مطبخ  يد صيني – وهو صحيح صيني بس يشتغل معاك كويس جدا.

وفي نفس الدور هتلاقي لعب الاطفال وكتب للاطفال ( بالكوري) واجهزة اللابتوب والموبايلات وكل ما يخصها( برضه غالية) – وكمان كل ما يخص السيارات من الداخل يعني جلد الدركسيون او روائح السيارة او او دهان بالرش للمناطق المخدوشة بكل الالوان – او اي حاجة تحتاجها لصالون السيارة- وفيه قسم لحاجات البيت المخصوصة زي معطرات المنزل و المنتجات الشيك الخاصة بالمطبخ زي ماسك الحلل او ايشاربات شيك وهيبان القسم ده من ريحته الحلوة   

هتلاقي كمان قسم خاص بيبيع فيه كل ما يخص اسماك زينة: سمك بكل الالوان – احواض باحجام مختلفة – زينة الاحواض وادوات تنظيف الحوض . 

وطبعا فيه قسم خاص بالكلاب وتربيتها واكلها ولعبها. لانهم مغرمين جدا بالحيوانات

وفيه القسم الارضي خاص بالملابس واحيانا بيكون فيه عروض كويسة علي الملابس وملابس الاطفال

فيه بقي اخر قسم وهو قسم السوبر ماركت وهو طبعا متنوع و اهم حاجة هتلاقي الاجلنب متجمعين عندها هي قسم الجبن وهتلاقي هناك زبادي وحيد بدون سكر وهو  Plain yogurt  وده شكله

 

plain yoghurt

اي نوع تاني هتلاقيه زبادي بالفواكه او بالسكر

وطبعا ممكن تلاقي جبنة فيلادلفيا 

 

 

وفيه كمان جبنة بري

باقي المنتجات هي اللي هتلاقيها في اي سوبر ماركت – المهم تستفاد من العروض اللي فيه

 3-  هوم بلاس:Home Plus
      وهو اصلا انجليزي وهو ده مكانه علي الخريطة

هوم بلاس برضه فيه نفس التقسيمة قسم الملابس وقسم السوبر ماركت وقسم لعب الاطفال وكتبهم وقسم خاص بالرياضة وزيادة قسم للمنتجات المستوردة

بس الزيادة فيه هو في الادوار العليا وتطلع له بس بالاسانسير ان فيه جيم وفيه حمام سباحة

4- Topmart توب مارت:

. يعتبر ارخص سوبرماركت علي مستوي كوريا الجنوبية وهو بس سوبرماركت يعني مش بيبيع ملابس

  

السينما في جنجو:

الكوريين بصفة عامة مهتمين جدا بالثقافة و عندهم اهتمام خاص بالافلام السينمائية ولازم تلاقي في كل مدينة سينما

فيه 3 سينمات في جنجو:

بالترتيب حسب الأفضل :

1-  MBC     المنطقة كلها باسمها قريبة من جامعة GNU ولو قلت للتاكسي ام بي سي بس هيعرفها - ولما تدخل المبني لازم تنزل في الدور اللي تحت لان فيه محل ألعاب زي سلة باسكت او اكس بوكس والعاب تانية ممكن تقضي بيها الوقت اثناء ما تستني ميعاد الفيلم او في اي وقت

  Lotte cinema2-   ودي مكانها في الداون تاون وبرضه لو قلت لوتي سينما هيعرفها سواق التاكسي.

  .  3- CGV  وماسمعتش عنها سمع خير لدرجة اني مادخلتهاش ولا مرة

اوتيلات جنجو:

فيه 2 اوتيل 5 نجوم مشهورين في جنجو:

الاول هو Dong Bang دونج بانج:  وده علي نهر جانج نام وقريب من القلعة

الثاني هو Asia lake Side  ايشيا ليك سايد :  وده مكانه علي البحيرة ولو تحب تروحه ممكن تركب تاكسي وتقول له Jinyangho او تركب اوتوبيس رقم 120 ب 1200 وون وتنزل في اااااخر محطة ليه وتمشي في اتجاه الللافتة حوالي 10 دقايق وخلي بالك هتطلع مطلع جبل يعني ماينفعش تكون لابس شوز غير مريحة

فيه بعد كده موتيلات صغيرة - بس كلها نضيفة والافضل موجود علي النهر والظريف ان بعد ماتدفع تمن الليلة او لو هتقعد ليلتين او تلاتة بيدوك كيس فيه فرش سنان ومشط و مستلزمات هتحتاجها - اسعارها تتراوح بين 40.000 - 60.000 وون ( عام 2014) وده يعتبر السعر الطبيعي في كوريا الجنوبية وفي ايام الويك اند بتبقي 60.000 - 70.000

اماكن لازم تزورها في جنجو:

   Jinjuseong1-   قلعة جنجو:  ودي من اشهر قلاع كوريا الجنوبية، طبعا هتيجي في مخيلتك قلعة زي قلعة صلاح الدين او اي قلعة من القلاع العربية اللي نعرفها. لا خاااالص

القلاع عندهم ليها تصميم مختلف – نظرا لان كوريا عبارة عن شبه جزيرة ومعظمها جبال فالقلاع بتاعتهم لو شفتها من بعيد هتحس كانها مجرد جزيرة او قطعه من الارض عادية لانها عبارة عن مساحة واسعة جدا علي كل اطرافها اشجار علشان تخفيها عن العين لدرجة ان المباني اللي جواها مش باينة - ودي صورة للقلعة من الجهه المقابلة تبين اللي باقوله

ودي صورة لمدخل القلعة

وده متحف جنجو القومي لا يفوتك ابدا انك تشوف الفيلم اللي بيحكي قصة القلعة دي وهتلاقي حد من الانفورميشن بتتكلم انجليزي هيقوللك عن المواعيد – الجديد في الفيلم ده انه  3D وكمان لو بتعرف انجليزي اطلب جهاز الترجمة

دي صورة لمعبد بوذي بداخل القلعة

 : Insa Dong2-  لو خرجت من السلم اللي جنب المعبد البوذي ومشيت علي شمالك جنب حائط القلعة – الشارع ده اسمه انسادونج وهو مشهور بالتماثيل وصانعيها – لو مشيت لاخر الحائط هتلاقي جنينة واسعة جدا وفي نصها نافورة ( بينك وبين النهر) النافورة دي موسيقية : 

مواعيدها من شهر ابريل الي شهر اكتوبر : كل يوم سبت واحد الساعة 5 والساعة 7 ومدتها نص ساعة ( المواعيد دي ممكن تتغير)

ولا تعمل في الشتا لان بيعملوا لها صيانة وكمان لان المية بتتجمد جوة المواسير

وبيتم الغائها في وقت المطر بصفة عامة في الصيف او الشتاء

3- Jinyangho  بحيرة جينيانجهو:

زي ما وصفناها قبل كده بعد اوتيل ايشيان سايد وممكن تروحها باتوبيس 120 وفعلا مكان رااائع ولو مش بتشتغل او رايح سياحة روحها في غير ايام الاجازات هتحس باسترخاااء رهيب واحيانا او نقدر نقول نادرا تلاقي واحد واقف بساكسفون بيعزف مع نفسه في وسط الهدووووء الرائع ده

البحيرة فيها مبني 3 ادوار فيه كافيه ممكن تقعد فيه وتستمتع بمنظر البحيرة من وفوق

 فيه كمان سلالم بتنزل لغاية البحيرة وعددها 365 سلمة - وعندهم اعتقاد ان اللي ينزل السلالم دي ويطلعها تتحقق له امنيته خلال السنة الجديدة

ده شكل السلالم

وفيه كمان قبلها حديقة حيوانات بتدخلها بتذكرة لوحدها وهو مكان لطيف ممكن تقضي فيه يومك بس بعد ما تزور البحيرة الاول

كمان في نفس المنطقة فيه حلبة مخصوصة لمصارعة الثيران :  كل يوم احد الساعة  1.00 ظهرا.

يعني لو رحت البحيرة هتزور 4 اماكن: الاوتيل - البحيرة والسلالم - حديقة الحيوانات - ومصارعة الثيران لو كانت زيارتك يوم الاحد.

    :Art Center4-  وده مكان لازم فعلا تزوره لو بتحب الموسيقي او الاغاني الكورية – وبيعملوا جدول شهري للحفلات ولو تابعته هتستفيد كتير جدا واحيانا كتير جدا بيكون فيه حفلات مجانية بس غالبا بتكون حفلات الاطفال

وفي الصيف كل ويك اند ( ماعدا الايام الممطرة ) بيعملوا حفلة قدامه عند النهر ودايما بتكون مجانية.

       

5- Down Town  وسط البلد:  عبارة عن شارعين فيهم محلات الميك اب المشهورة Thefaceshop - TonyMoly - Thebodyshop -  ومحلات ملابس 

وفيها محلين مشهورين للشباب الصغير لان فيه حاجات غريبة وجديدة زي اقلام بشكل غريب او شنط شكلها جديد 

وكمان فيه مطعم مشهور ممكن تاكل عنده احلي دامبلينج او بيبيمباب – وهنتكلم عنه مع المطاعم فيما يلي.

فيه حاجة مهمه لازم تاخد بالك منها: المحلات والكوافيرات و المطاعم مش بس في الدور الارضي – لا حضرتك لو بصيت فوق هتلاقي كل دور فيه محل خاصة في الداون تاون

وغالبا المبني اللي تلاقي فيه محلات من تحت مش بيبقي سكني يعني هتلاقي كل الأدوار تجارية ومحلات.

ومن الحاجات المميزة في كوريا كلها  الاندرجراوند شوب او التسوق تحت الارض - في منطقة الداون تاون في جنج لو لقيت سلم لتحت انزله هتلاقي محلات بتبيع ملابس او موبايلات او جرابات موبايلات وكمان هتلاقي ستوديو لو عايز تطلع صور شخصية

6- GNUniversity  جامعة GNU اي جامعة جيونجسانجنام :

 

   وليها مدخلين، مدخل رئيسي علي الشارع الرئيسي ومدخل جانبي وممكن تدخل جواها مشي او بالدراجة او بعربيتك لو تحب وممكن تتعرف علي الكليات اللي فيها وفيه مبني مخصوص اسمه انجليش اونلي زون لو تحب تدرس حاجة معينة او تسأل علي حاجة ممكن تطلع في اي دور ويمكن تلاقي حد تسأله بس هم ليهم مواعيد مش موجودين علي طول

واهم ما يميز الجامعة: المكتبة العامة ومكانها في وش المدخل الرئيسي للجامعة وفيه ساعة من فوق وهو مكان فوق الرائع وممكن تلاقي فيه كتب باللغة الانجليزية

لو حد مقيم لفترة في جنجو ممكن يعمل اشتراك في الجامعه بكارت الاقامة ولو مافيش اشتراك ممكن تدخل تقرا بس مش مسموحلك تاخد اي كتب معاك برة المكتبة 

      7- منطقة الجامعة وهي الجهة الاخري من الجامعه وهي مليااانة بالمطاعم

وفيها محلين مشهورين زي مكتبتين واحد منها اسمه "ألفا" والتاني مش مكتوب اسمه بالانجليزيبس هتقدر تعرفه من شكله من بره لانه معلق كل ما تتخيله ومكانه  قبل "الفا " بحوالي5 عمارات وهم علي الشارع الرئيسي قدام بوابة الجامعة الرئيسية

ده لو دخلتهم اكيد هتشتري حاجة لان فيهم حاجات غريبة زي اقلام شكلها غريب او دباديب كورية او سماعات شكلها جديد او ميك اب او مانيكير او اي منتجات مكتبية

   

8- السوق القديم المغطي: وهو في الداون تاون لو مشيت في الشارع الرئيسي اللي قدام الكوبري في اتجاه مول جاليريا هتلاقي علي اليمين في شارع من الشوارع بوابة قديمة وهو ده شكل بوابة السوق القديم من الشارع الرئيسي

 – فيه كل حاجة تقليدية وشعبية زي الهانبوك ( الزي الكوري الشعبي) ومحافظ الفلوس الملونة من نفس قماش الهانبوك وممكن تشتري منه تذكارات وهدايا لطيفة

حوالين السوق القديم ده فيه سوق الخضار والسمك القديم ودايما بيكون زحمة لان الكوريين بيشتروا منه الخضار والسمك وكل اللي بيحتاجوه واسعاره دايما بتكون اقل من المولات وطبعا بيكون طازة ونضيف

9- Arboretum  الاربوريتام او الحديقة النباتية:

أفضل وقت لزيارتها هو الخريف - هتشوف أجمل ألوان شجر وكفاية الصورة لان الوصف مش كفاية ( مع العلم ان الصور اللي في المدونة كلها من تصويري علي الحقيقة)

 

مطاعم وأكلات :  ( هي طبعا أذواق وانا هنا هاتكلم عن اللي كنت باستسيغ أكله):

علي فكرة فيه مطاعم كتير بتقدم الاكلات اللي هاتكلم عنها بس هاكتب هنا بس اللي جربته

1- Samsung Buffet سامسونج بوفيه:

وهو اوبن بوفيه - بوفيه مفتوح - بيقدموا فيه كل الاصناف كوري وياباني وصيني وبانصح بيه اي حد عايز يجرب الاكل الكوري  ( سعر الفرد سنة 2014- 16500 وون كوري)

2- Bibimpap بيبيمباب:

اكلة مشهوره في كوريا،  باب يعني رز

البيبيمباب عبارة عن: طاجن فخار فيه من تحت رز مطبوخ بالطريقة الكوريه يعني مسلوق وفوقه هتلاقي تشكيلة ملونة من الخضار

وهو ده شكله 

المشكلة فيه بس هي الاخضر اللي عالوش ده وهو طحالب ولو ماتحبش تجرب شيله وكل الباقي او ممكن تقوللهم من الاول : نو سيويد

زي ما قلت المحل اللي في الداون تاون بيقدمه 

3- Kimpap كيمباب :

ده زي السوشي الياباني بس مختلف في طريقة الصنع، مكون من رز مسلوق ومقطع معاه خضار او جمبري وملفوف في طحالب بحر - وهي تعتبر من اشهر المقبلات عند الكوريين

4- Gogi Mando جوجي ماندو :

يعني دامبلينج محشي لحمة بس خلي بالك دي لحمة خنزير بس لو بتحب الجمبري فيه دامبلينج محشي جمبري وعامة المنيو فيها انجليزي

5- Samgey Tang سامجي تانج او شوربة فراخ:

       

سامجي معناها فراخ وتانج معناها شوربة وهي عبارة عن فرخة صغيرة محشية رز وبيقدموها في طاجن فخار مع شوربتها – هي طعمها مختلف عن طعم اللي بنطبخها في الشرق الأوسط لأنهم مش بيستعملوا توابلنا المعروفة 

زي الحبهان والمستكة وورق اللورا – هم بيحطوا نبات الجنسنج معاه – يمكن في الاول

 ما تستسيغش طعمها بس تاني تجربة هتلاقي طعمها لطيف بس علشان مش متعودين علي الجنسنج – أغلب الكوريين متعودين ياكلوها 

بس في الصيف رغم انها بتبقي سخنة جدا.

عنوان أشهر محل في جنجو بيقدم السامجي تانج: في الداون تاون في الجهة المقابلة لسينما لوتي هتلاقي كافيه Angel in us  واخد ناصية لو مشيت في الشارع اللي جنبه علي طول هتلاقيه برضه علي ناصية؟

  6- كابوريا: 

لو بتحب السي فوود فممكن تاكل عندهم كابوريا بس هم مش بيعملوها برضه زينا وانا بافضل الكابوريا الكبيرة وهم عندهم لونين برتقالي وابيض مافيش فرق تقريبا بينهم واشهر مطعم هتلاقيه علي النهر بعد مستشفي GNU وهتلاقيه اللافتة بتاعته عبارة عن كابوريا كبيرة جد – بس هتلاقيها غالية جدا وكل المطاعم تقريبا بتقدمها بنفس السعر بس الجميل بيكون المقبلات اللي بيقدموها معاها

وهو ده صورته

رز مخلوط بطحالب بحر وحاطينه في قشرة الكابوريا الخارجية

     Galby Tang - 7   جالبي تانج: 

زي ما عرفنا قبل كده ان تانج يعني شوربة وجالبي يعني لحمة: وغالبا بتكون لحم بقري ولازم تسأل في الاول اذا كان بيف ( بقري) او بورك ( خنزير) وفيه نوعين فيه مطاعم بتقدم ريش لحمة وفيه مطاعم بتقدم قطع لحمة مع الشوربة في طاجن فخار برضه

واشهر المطاعم اللي بتقدمها هي سلسلة مطاعم معينة هي دي شكلها بس لو مش بتحب الاكل سبايسي قول قبل ما تطلب نو سبايسي

       Galby  BBQ8- جالبي باربيكيو: 

احنا عرفنا ان جالبي يعني لحمة وفيه نوعين من المطاعم الاول بيقدم لحم خنزير وفيه مطاعم بتقدم لحم بقري – كل اللي عليك قبل ما تدخل المطعم تشوف هم راسمين ايه؟ بقرة ولا خنزير. والمطاعم اللي بتقدم الجالبي باربيكيو بتقدم اكلات كتييير جدا غيره فمثلا بيقدموا حاجة اسمها سانجيوبسال وهي عبارة عن شرائح رفيعة جدا من اللحمة نصها دهن ونصها لحم وبيشوها وفيه كمان حاجة عبارة عن مستطيلات بيضة اكتشفت بعد كده انها جلد بيشووه علشان هم شايفين انها مفيدة للبشرة بس هي دسمه جدا.

الجالبي باربيكيو هو عبارة عن قطع لحمة متشفيه وطويلة و نقعينها  في صويا صوص لمدة طويلة وبيقدموهالك نية في طبق بالصوص بتاعها ومعاها مقص وماسك تمسكها بيها و الترابيزة بيكون فيها في النص شواية وغالبا اكراما منهم هم بيبدأوا ويساعدوك في الشوي وبعد كده يسيبوك واحيانا لو شافوك بتعرف بيسيبوك انت تشوي براحتك وبيقدم لك مع طبق اللحمة خس وكيمتشي والكيمتشي هو مخلل كرنب بس بيحطوا عليه تتبيلة معينة

اشهر المطاعم اللي بتقدمها هم 3

الاول مكانه في منطقة اسمها قدام الكوبري وشكله هيبقي باين من بعد لانه 5 ادوار

والمطعم التاني مكان محطة القطر القديم وهو ده مكانه علي الخريطة

اما التالت فاسمه سيلف بار وهو موجود في اخر شارع في الداون تاون

       

9- الاكل الفيتنامي: 

الاكل الفيتنامي يعتبر زي المطعم الشامي بالنسبة للشرق الاوسط هو المشهور باكله ذو الطعم الخاص، طريقة تقديم الاكل

الترابيزة بيكون فيها بوتاجاز في النص بعد ماتختار من المنيو طلبك وهو غالبا بيكون 4 انواع : سي فوود او خضار بمشروم او خضار ولحمة – او سبايسي

بعد ما تختار طلبك بيجيبوالك طبق ستانلس فيه شوربة معينة ويحطهالك علي النار ويجيب طبق علي عدد الافراد فيه سائل احمر ويقدم لك طبق كبير عليه طلبك – لو حضرتك طالب خضار بلحمة يبقي الطبق عليه قطع لحمة رفيعة جدا وملفوفة زي السيجار (واضحة في الصورة) وجنبه مشروم ومعاه جزر وخس و بعض الخضروات الورقية  واحيانا بيحطوا معاها دامبلينج واحيانا بروكلي  واهم حاجة ان معاهم ورق ابيض مدور ناشف وهو عبارة عن ورق رز وهو ده اللي بيميزه ومعاهم مقص وماسك – حضرتك تحط الخضار في الشوربة ومعاهم اللحمة الملفوفة ( بس خلي بالك من مكانها لانها رفيعة جدا ولما تستوي مش هتبان من وسط الخضار) لما تحس ان اللحمة استوت حضرتك هتمسك بالماسك ورقة رز واحدو تحطها في السائل اللي في الطبق بتاعك تبله بس هتلاقيه بقي طري هتحطه مفرود علي طبقك وتاخد من اللي علي النار قطع لحمة ومعاها خضار وتحطه علي ورقة الرز وتلفها من كل الجوانب وتاكلها – طعمها فعلا مميز ومختلف

وفي الاخر يجيبولك الرز بعد ماتخلص اكل وبيطبخوه مع الخضار الباقي بطريقتهم ويقدموهالك في طبقك؟

10- اغلب المطاعم الباقية  بتقدم اكل كوري مختلف عن اللي قلته وهو الاكل المطبوخ بصلصة سواء كان سي فوود او خضار ولحمة وغالبا الصلصة بتكون سبايسي جدا

       

 11- الاكل الايطالي : فيه مطاعم كتير مكتوب عليها من بره باستا او بيتزا وكلهم زي بعض بيطبخوا الاكل بنفس الطريقة وبيعملوا الباستا او البيتزا بالطريقة الكورية مش ايطالي 100%

12-  لو حضرتك عايز تاكل اكل هندي او تركي مثلا فمافيش اي مطاعم في جنجو لغاية دلوقت (2014) انما هتلاقي في بوسان جنب المسجد هناك مطعم تركي ووراه مطعم مغربي – غير كده هتلاقي في سول في ايتاون كل المطاعم حتي العربية

13- طبعا فيه ماكدونالدز وشبيهه الكوري لوتيريا Lotteria ويتميز لوتيريا عن ماكدونالدز انه بيقدم سلطة وكمان انه بيعمل ريفيل للكولا يعني لو خلصت كوباية الكولا بيملاهالك مجانا

14- فيه بيتزا هت وشبيهه مستر بيتزا  Mr. Pizza وبيتميز مستر بيتزا ان اسعاره اقل عن بيتزا هت وانه كمان بيقدم لازانيا بس لازانيا بتاعته مختلفة عن اللي نعرفها لانهم بيعملوها بمكرونة شرايط او سباجيتي مش صفايح ( اغلب المطاعم الايطالية في كوريا بتقدمها بالطريقة دي مش بس مستر بيتزا)

الفاكهة:

- الفراولة في شهور الربيع مارس وابريل

- المشمش والخوخ والبطيخ في شهور : 7،8

- وعندهم فاكهة شبه الشمام بس صغيرة اد كف الايد ودي موجودة اغلب الشهور بس طعمها زي الشمام من غير سكر خالص

- عندهم فاكهة الكاكا مشهورة في شهور الشتاء

- التوت بانواعه والكيوي والتفاح موجود عندهم اغلب الشهور

- الليتشي والدراجون فروت  موجودة عندهم بس موسمهم صغير

- العنب عندهم نوعين اسود وهو فيه مزازة وبياكلوه بالمص يعني يمصوه ويرموا القشر لان قشرته سميكة 

والنوع التاني العنب بتاعنا الاخضر بس ببذر

الحلويات المشهورة عندهم:

الرايس كيك وبيعملوها باشكال والوان كتيير جدا

الريد بين وبيعملوه زي المربي وبيحطوه فوق اي اكل

عندهم نوع غريب جدا من الحلويات دايما ياكلوه غالبا في الصيف بس ماعندهمش مشكلة ياكلوه في الشتا: وهو الثلج

ما تستغربش – ايوة ثلج وده موجود في كل الكافيهات عبارة عن كوباية (لو لاتنين بيبقي حجم اكبر) بيملوها تلج لاكتر من نصها ويحطوا فوقها ريد بين او قطع مانجة صغيرة او رايس كيك وبودرة ريد بين

واحيانا بعض الكافيهات بيحطوا فوقها بولة ايس كريم وهي دي الاكلة المميزة اوي عندهم ويقبلوا عليها جدا
 

واخيرا التورتات بس لاعياد الميلاد

اماكن المخبوزات:

باريس باجيت Paris Baguette  - بانامي Panamie  - تو لي جور Tous les jours  

وهم موجودين في كل شارع واحيانا تلاقي فرعين في نفس الشارع

مع العلم ان مافيش عيش او خبز زي البلدي او الشامي او حتي الفينو

المستشفيات

اشهر مستشفي ,هي مستشفي الجامعة وهي موجودة علي النهر وفيها مترجمة  GNU

اماكن شراء كل ما تحتاجه

 اولا: لو عايز تشتري اكل تطبخه زي العدس او القلقاس او خضرة القلقاس والكسبرة الخضرة مثلا مش هتلاقيهم في السوبرماركت لان ده مش اكل الكوريين فالحل الوحيد انك تتوجه Asian Market  الماركت الاسيوي وهو شارع فيه اكتر من محل يمتلكه هنود او كوريين او اجانب وبيجيبوا فيه بضاعة من برة كوريا وهاوصفلك  مكانه:  في طريقك لهوم بلاس وقبل ما توصله هتلاقي علي الشمال علي الجهة الاخري من الطريق من هوم بلاس محل اصفر اسمه تاير ستاشن OTire Station علي ناصية شارع اتجاهين هتدخل الشارع ده واول شارع علي ايدك الشمال هو ده اللي هتلاقي فيه الماركت الاسيوي وممكن تلاقي فيه منتجات هندي وفيتنامية ومنغولية

      
  ثانيا: لو عايز تجيب حاجات رخيصة لبيتك زي خيوط وابرة للخياطة او شمسية او اكياس مخدة او مشاية او حاجات المطبخ زي الاطباق والحلل والملاعق او ماج رخيص الحاجات دي كلها مش لازم تجيبها غالية لان غالبا ماهتترمي وكمان مش حاجة مضرة للصحة – هتلاقيها في محل اسمه Daiso وهو ليه فرعين في جنجو فرع في الداون تاون في السوق القديم اللي اتكلمنا عنه قبل كده هتلاقي فرع ، والفرع التاني لو ركبت اتوبيس 120 في اتجاه بحيرة جينيانجهو هتلاقيه بعد ايمارت بحوالي 4 محطات

   ثالثا: اللحوم والخضار الافضل من المولات خاصة توب مارت لانه ارخصهم وكلهم نوعية واحدة بس لو تحب ممكن من سوق الخضار في الداون تاون بس انا بافضل توب مارت

 

رابعا: الملابس بقي دي حسب مقاسك لو مقاسك كبير فاحسن حاجة انك تشتري عن طريق الانترنت وما تحاولش ابدا تدور في المحلات لان استحالة تلاقي مقاسك اما لو في نفس حجمهم فسهل وهتلاقيه مقاسك في اي محل في المولات او الداون تاون واسعارهم معقولة لو مش ماركة مشهورة او ماركة مشهورة في وقت الاوكازيون.

 الاماكن الدينية

1- 
لو مسلم فالافضل انك تشترك في صفحة جنجو علي الفيسبوك وتسأل لان فيه هنود كتير مسلمين واكيد يعرفوا اماكن الصلا واماكن التجمع – ولو عندك اجازة ممكن تروح جامع بوسان وده تليفونه:
+60 19-341 8303

2- 
لو مسيحي ارثوذكسي فللاسف مافيش ولا كنيسة ارثوذكسية في جنجو بس فيه في بوسان وسول واولسان ودي صفحة الكنايس الارثوذكسية هناك بس برضه هي كنائس شرقية يعني هتلاقيها روسية او يونانية وعامة ارثوذكس فمافيش مشكلة

http://orthodox.or.kr/html/include2.php?inc=ehin_03_01

3- 
لو مسيحي كاثوليكي ففيه كاتدرائية في جنجو ومكانها هتلاقيه بالضبط ورا قاعة فور سيزونز اللي علي النهر جنب الارت سنتر. وهم بيعملوا خدمة خاصة للاجانب بالانجليزي يوم الاحد وهناك ممكن تعرف مكان الكنيسة اللي جنب سكنك لان فيه 11 كنيسة كاثوليكية في جنجو منهم كنيسة في منطقة الجامعه بس صعب وصفها

-4

 لو مسيحي بروتستانتي، فيه كنيستين رئيسيتين للاجانب

- https://www.facebook.com/groups/151962864895663/

 http://jinjuchurch.or.kr/

بالنسبة بقي لو حد مش بيشتغل وزهقان عندهم في جاليريا و ايمارت وهوم بلاس مكان هتلاقيهم عارضين فيه مشغولات فنيه او اورج او جيتار – المكان ده ممكن حضرتك تروح تشترك في اي كورس: كورس تعليم عزف موسيقي علي الاورج او علي الجيتار – تعليم الكروشيه – تعليم الاشغال اليدوية – وبصفة عامة هوم بلاس هو ارخصهم( 50.000 وون كوري في ثلاثة اشهر بالنسبة لتعليم الكروشيه والتريكو) انما طبعا في جاليريا غالي جدا و ايمارت كمان غالي

وعلي فكرة طول ما انت ماشي في الشوارع هتلاقي مكان بيعلم عزف الموسيقي وممكن تدخل وتشترك فيهم 
 وبتختلف الاسعار من مكان للتاني

بعض اللينكات المفيدة جدا اثناء اقامتك في جنجو:

 ده اهم موقع من وجهه نظري لاي زاءر او مقيم في كوريا كلها، لو عايز تعرف مكان اي حاجة في كوريا اكيد هتلاقيها علي السايت ده - بس المواعيد احيانا بتكون مش مضبوطة واحيانا كمان بيكون فيه ترميم في المكان ومش مكتوب عليه - بس هو فعلا موقع اكتر من رائع برعاية الحكومة الكورية
http://english.visitkorea.or.kr/enu/1001_About%20Korea.jsp

صفحة المقيمين بجنجو علي الفيسبوك
https://www.facebook.com/groups/jinjupage/

صفحة بيع وشراء المستلزمات المستعملة للمقيمين في جنجو
https://www.facebook.com/groups/275735042493059/

صفحة اماكن المطاعم في جنجو
https://www.facebook.com/groups/141832285828132/

صفحة لاماكن المطاعم في سول علشان لو رحت زيارة هناك
https://www.facebook.com/groups/seouleats/

صفحة لو عندك موبايل او كمبيوتر او لابتوب باظ، بيصلحوه
https://www.facebook.com/groups/KoreaMacPCGuys/

صقحة للوظائف غير التدريس في كوريا كلها
https://www.facebook.com/groups/658301587514567/

صفحة لوظائف التدريس في كوريا كلها
https://www.facebook.com/groups/51592343028/

صفحة لملجأ خاص بالرضع المتروكة من اهاليهم علشان لو تحب تتبرع لهم ومكانه في سول مش جنجو
https://www.facebook.com/babyboxkorea

صفحة لمجموعه بتقدم رحلات مخفضة داخل كوريا وموثوق فيهم:
https://www.facebook.com/groups/311569382310057/
https://www.facebook.com/groups/lonelykorea/
https://www.facebook.com/adventurekorea?ref=profile 

صفحة بتعرف المقيمين في كوريا بالجديد وتفاصيل عن المهرجانات:
https://www.facebook.com/groups/44021521829/
https://www.facebook.com/groups/festivalandevents/
https://www.facebook.com/bugs2013?ref=profile


اتمني تكونوا اتعرفتوا علي جنجو من الداخل عن طريقي وبارحب بأي تساؤل